Turantv.AZ bildirir ki, bunu Qaynarinfo-ya açıqlamasında təhsil eksperti Kamran Əsədov sertifikasiya imtahanlarında yüksək nəticə göstərmiş müəllimlərin əmək haqqlarının artırılması haqqında təklifindən danışarkən deyib. Onun sözlərinə görə, hazırda ciddi şəkildə dəyişməli olan məsələlərdən biri müəllimlərin əmək haqqlarının artımıdır:
"Sertifikasiya olduqca vacibdir. Bu, müəllimlərin həm əmək haqqlarına, həm də dərs saatlarına öz təsirini göstərəcək. Amma hazırda əmək haqqı artımı faizi doğru yanaşma deyil. Yəni, 10-35% arasında ciddi bir fərq var. 50 bal toplayan müəllimlə 30 bal toplayana eyni əmək haqqı artımını etmək ədalətli deyil. Bu qaydalar dəyişməlidir. Elm və Təhsil Nazirliyi sertifikasiya qaydalarını müəyyən etdiyi bir il ərzində qaydalarda 9 dəfə fərqli dəyişiklik edib. İstər keçid balı, istər 60 yaşdan yuxarı müəllimlərin sertifikasiyaya buraxılmaması məsələsi və s. qaydalar dəyişib”.
Ekspert hesab edir ki, hazırkı qaydalar dəyişməlidir:
"Yəni, 30-40% bal toplayanların 10%, 40-50 bal arasında toplayanların 20% və yaxud da 51-60% arasında bal toplayanların əmək haqqları artırılmalıdır. Sertifikasiyanın əsas məqsədi müəllimi öz biliyinə görə qiymətləndirməkdirsə, 50 bal toplayanla 30 bal toplayan müəllimin eyni qiymətləndirilməsi ədalətdən danışmağa imkan vermir”.
Qeyd edək ki, Milli məclisin deputatı Vüqar Bayramov sertifikasiya imtahanlarında yüksək nəticə göstərmiş müəllimlərimizin əmək haqqları artırılması haqqında təklif edib. Deputat bildirib ki, sertifikasiya imtahan nəticələrinə uyğun əmək haqqı artım mexanizminin təkmilləşdirilməsi vacibdir.