Türkiyə ilə sərhədin açılması Ermənistana nə verəcək?

Publika.az xəbər verir ki, Ermənistanın Türkiyə ilə sərhədinin açılmasından əldə edəcəyi ilkin mənfəət məlum olub. Bu barədə "Sputnik Ermənistan"a yazılı sorğuya cavab olaraq Ərazi İdarəetmə və İnfrastruktur Nazirliyindən məlumat verilib.

Hesablamalara görə, Marqara keçid məntəqəsi vasitəsilə Türkiyəyə birbaşa yükdaşımalarının başlanması yola sərf ediləcək vaxtın, yanacaq xərclərinin azalmasına və ixrac həcminin artmasına səbəb olacaq. Üstəlik, erməni daşıyıcıları üçüncü ölkələrə tranzit üçün pul ödəməli olmayacaqlar. Nazirlik hesablayıb ki, yeni marşrutla yüklərin daşınması zamanı çəkisi 40 ton olan yük maşını gediş vaxtını təxminən üç saat azaldacaq, yanacağa qənaət isə 75 litr olacaq.

Xatırladaq ki, hazırda Ermənistanla Türkiyə arasında yükdaşımaları əsasən Gürcüstan üzərindən həyata keçirilir. 2022-ci ilin sonunda Türkiyə Ermənistana hava yolu ilə 3,1 ton, yük maşınları vasitəsilə isə 24 903,8 ton yük ixrac edib. Yəni ki, Türkiyədən Ermənistana ixracın həcminin 99,9%-i quru, hava yolunun payına düşür.

Əgər sərhəd açılarsa, Ermənistandan Türkiyəyə və əks istiqamətdə yük daşımaları üç istiqamətdə həyata keçirilə bilər: Axurik, Marqara və Quşakert rayonları vasitəsilə. Lakin bu yöndə işlər hələ də davam etdiyi üçün sərhədin açılmasının faydaları ilə bağlı yekun hesablamalar yoxdur.

Qeyd edək ki, hazırda Ermənistana və geriyə yük maşınları İrəvan-Bavra-Axalkalaki-İstanbul marşrutu ilə hərəkət edir. Bu marşrutun uzunluğu 1755 km-dir. Sərhədin açılacağı təqdirdə istifadəsi nəzərdə tutulan İrəvan-Marqara-İstanbul yolunun uzunluğu isə 1570 km-dir