Məhkəmə-tibbi eksperti vəkildən rüşvət istəyib - ŞİKAYƏTLƏRİNƏ İSƏ BAXILMIR

Gündəm / Manşet

20.09.2022, 12:47

Məhkəmə-tibbi eksperti vəkildən rüşvət istəyib - ŞİKAYƏTLƏRİNƏ İSƏ BAXILMIR

TEREF.AZ xəbər verir ki, Bakı şəhəri 13 saylı vəkil bürosunun vəkili Abdullayeva Vəfa Əmiraslan qızı Gununsesi.info-nun elektron ünvanına üzləşdikləri qanunsuzluqla bağlı şikayət ərizəsi yazıb.

Vəkilin müraciətini olduğu kimi təqdim edirik:

16.05.1959-cu il təvəllüdlü atam, Abdullayev Əmiraslan Əmrah oğlu, 28.04.2022-ci il tarixdə saat təxminən 11:15 radələrində Bakı şəhəri Xətai rayonu, Neapol küçəsində səkidə 99JP576 nömrəli dövlət qeydiyyat nişanlı yük maşını hərəkətə başlayarkən, səkidə üzü arxaya dayanmış vəziyyətində kürəyindən vurulmuş, nəticədə atam zərbədən yerə çırpılmış, müxtəlif bədən xəsarətləri almışdır.

Hadisəni törədən "Avrora” MMC-yə məxsus 99JP576 dqn yük maşınının sürücüsü Əsədov Coşqun Fuad oğlu yük maşınında olan bir nəfər şəxslə birlikdə atama heç bir köməklik göstərmədən hadisə yerindən qaçmışlar.

Həmin gün özüm atamı həkimə apardıqdan, həkim bədəninin bərk ağrı olan nahiyələrinin rentgen etdikdən sonra, Xətai rayonu üzrə məhkəmə-tibbi eksperti Ədalət Quliyevin şəxsən müayinəsindən keçirmişəm.

Bakı şəhəri Xətai rayonu üzrə məhkəmə-tibbi eksperti Ədalət Quliyev rəy tərtib edərkən həkim sənədlərini, üzərinə baxış keçirərək müayinə etdiyi atam Abdullayev Əmiraslan Əmrah oğlunun ağır vəziyyətini, bərk ağrılardan şikayət etdiyini, hadisə günü ekspertə bildirdiyi ifadələrini belə nəzərə almadan öz rəyində tamamilə olanların əksinə olaraq, rəyində bilərəkdən və qəsdən saxta xəsarətlər qeyd etmişdir.

Səbəb kimi, məndən 700 (yeddi yüz) manat pul istəməsini qeyd edə bilərəm. Mən isə öz növbəmdə, həmin ekspertə atamın müvafiq həkim sənədlərinin olduğunu, həmin sənədlərdə 3-cü qabırğanın sınığının və sol dizində hemortrozun olduğunu, özünün müayinəsi zamanı atamın bərk ağrılardan şikayət etdiyini, məhz bu səbəblərdən ilkin olaraq rentgenlərdən keçdiyini, ekspertin özünün göndərişinə əsasən müqayisəli ekspertizanın da nəticəsinin eyni olduğunu bildirdim. Məhkəmə-tibbi eksperti isə, bunların ona aidiyyətinin olmadığını və sənədləri konsultantlara göndərəcəyini bildirdi. Halbuki, həmin kosultantın nə adı, soyadı, nə də barəsində heç bir məlumat qeyd edilməmişdir.

Ekspert Ədalət Quliyev atama ilkin tibbi yardım göstərən və müalicə edən cərrahla da telefon vasitəsilə söhbət etmiş, atamın ümumi vəziyyətini cərrahdan öyrənmiş, lakin bütün bunlara baxmayaraq, həkimə sorğu göndərmək əvəzinə dəfələrlə (bir dəfə göndərişlə, daha sonra şifahi olaraq) atamı rentgen müayinələrinə göndərmiş, istədiyi 700 (yeddi yüz) manat məbləği vermədiyimizə görə özünün istədiyi rəyi istədiyi formada tərtib etmişdir.

İlk növbədə, Ekspert Ədalət Quliyevin tərtib etdiyi rəyin Xətai RPİ-nin Təhqiqat Şöbəsinə ünvanlanması barədə heç bir məktubu yoxdur, tamamilə yalanlarla və cəfəngiyatlarla dolu rəydir, rəydə məhkəmə-tibbi eksperti Ədalət Quliyevin ali təhsili və ixtisas və elmi dərəcəsi barədə heç bir məlumat yoxdur, həmçinin, atam həmin ekspertə həmin günü rentgendən keçdiyi sağ kürək və sol diz nahiyələrindən bərk ağrılardan şikayət etmiş, lakin ekspert öz rəyində cüzi ağrılardan, sol diz oynağında bərk ağrılardan deyil, sol baldır nahiyəsində sıyrıqların olduğunu şikayət etdiyini, sağ dizindən rentgendən keçmədiyi halda sağ dizinin rentgenoqrafiyasını radioloqa göndərdiyini qeyd edir, daha sonra həkimin sol diz nahiyəsindəki hemortrozla bağlı arayışında göstərilənlərlə bağlı faktı əks etdirən halı ümumiyyətlə araşdırmamışdır, nəticə hissəsində guya heç bir xəsarətin aşkar edilmədiyini bildirmişdir, eyni zamanda, rəyin özü düzgün səhifələnməmiş, rəyin belə desək 3-cü səhifəsində sənədlərin adı çəkilməyən radioloqa göndərildiyi, axırıncı 4-cü səhifəsində isə ( ekspert özü 3-cü səhifə qeyd edib, halbuki o, 4-cü səhifə hesab edilir) yenə də adı çəkilməyən rentgenolqun müayinəsindən keçdiyini qeyd etmişdir. Beləliklə, tərəfimdən niyyəti və maddi marağının təmin edilmədiyinə görə məhkəmə-tibbi eksperti Ədalət Quliyev qərəzlilik nümayiş etdirmiş, qeyri-obyektiv rəy tərtib edərək, tamamilə yalan rəy vermişdir! Azərbaycan Respublikası Cinayət-Prosessual Məcəlləsinin 97-ci maddəsində göstərilən hüquq və vəzifələrinin ekspertə izah olunmasına baxmayaraq, məhkəmə-tibbi eksperti Ədalət Quliyev Azərbaycan Respublikası Cinayət Məcəlləsinin 297-ci maddəsinin tələblərini kobud şəkildə pozmuş və bilə-bilə tamamilə yalan rəy vermişdir. Məhkəmə-tibbi ekspertinin məndən pul əldə etməsi niyyətinin baş tutmaması səbəbindən onun tərtib etdiyi ekspert rəyi qərəzlidir, qeyri-obyektivdir, yalanlarla, cəfəngiyatlarla doludur və tərəfkeşli olmaqla tədqiqatı birtərəfli qaydada aparmışdır. Bu səbəbdən, məhkəmə-tibbi ekspertinin tərtib etdiyi rəy təhqiqat və istintaq üçün əsas ola bilməz!

Məhkəmə-tibbi eksperti Ədalət Quliyevin həmin rəyindən narazı qalaraq, komission məhkəmə-tibbi ekspertizasının keçirilməsi barədə təhqiqat şöbəsinə ərizəmlə müraciət etdim. Bundan sonra baş təhqiqatçı Teymur Ağamirov tərəfindən həkim və rentgen sənədlərinin təhqiqat şöbəsinə göndərilməsi ilə bağlı Xətai rayonu üzrə Məhkəmə-Tibbi ekspertizası və pataloji anatomiya birliyinə məktubla sorğu göndərmiş, sorğuya əsasən həmin birlik tərəfindən yalnız və yalnız 3 ədəd qara rəngdə rentgen görüntüsü geri qaytarılmış, digər həkim sənədləri (7 nömrəli şəhər poliklinikasının baş həkminin arayışı, ekspert Ədalət Quliyevin 28.04.2022-ci il tarixli, 405 saylı göndərişinə əsasən 23 saylı şəhər poliknikasının rentgen həkimi tərəfindən verilmiş flüoqrafiya sənədi (həmin sənəddə 3-cü qabırğanın sınığının olması göstərilir) və sol diz oynağının rentgenoqrafiya sənədinə əsasən verilmiş həkim kağızı (həmin sənəddə isə sol diz oynağının hemortrozunun olduğu qeyd olunur) məhkəmə-tibbi eksperti Ədalət Quliyev tərəfindən bilərəkdən gizlədilərək, ortaya çıxmamışdır.

Komission məhkəmə-tibbi ekspertizasının keçirilməsi barədə ərizəm Məhkəmə-Tibbi Ekspertizası və Pataloji Anatomiya Birliyində olmasına baxmayaraq, bir neçə ay, demək olar ki, 3 ay keçməsinə baxmayaraq, müvafiq həkim sənədlərimiz bilərəkdən və qəsdən ekspert Ədalət Quliyevdən tələb edilmədi və bütün bunlar həmin birliyə 14.06.2022-ci il tarixdə 0125948394 nömrəli telefon vasitəsilə zəng etdiyim zaman mənə aydın oldu. Bundan sonra komission məhkəmə-tibbi ekspertizasının da obyektiv rəy verməsinə əsaslı şübhələrim yarandı və şübhələrim nəticədə öz təsdiqini tapdı. Eyni zamanda, komission məhkəmə-tibbi ekspertizası zamanı atam rəyi imzalayan ekspertlər, ümumiyyətlə heç bir ekspert tərəfindən tərəfindən müayinədən keçirilməyibdir. Ədalət Quliyevin cəfəngiyatlarla dolu rəyi, olduğu kimi, eynən komission-tibbi ekspertiza rəyinə köçürülmüşdür.

Ədalət Quliyev atama məxsus həkim sənədlərini bu günə qədər qaytarmamışdır.

Bununla bağlı Hüquq-mühafizə orqanlarına və Məhkəmə-tibbi ekspertiza və Pataloji Anatomiya Birliyinə şikayətlər etsəm də, həmin ekspertin barəsində, eyni zamanda hadisəni törədən sürücü Əsədov Coşqun Fuad oğlunun barəsində artıq beş aya yaxındır ki, heç bir hüquqi tədbir görülməmişdir.

Şikayətlə bağlı Məhkəmə-Tibbi Ekspertiza Mərkəzinin telefonlarına etdiyimiz zənglər cavabsız qaldı.