Salyan rayonunda məktəblilərin olduğu avtomobil qəza törədib, bir nəfər ölüb.

“Qafqazinfo”nun əldə etdiyi məlumata görə, Şirvan şəhərindən olan şagirdləri Cəlilabad rayonuna güləş yarışına aparan sürücü idarə etdiyi “Mercedes Vito” markalı mikroavtobusun idarəetməsini itirərək aşırıb.

Qəza nəticəsində Şirvan sakini, 12 yaşlı Əhmədov İlkin Adil oğlu vəfat edib, digər iki şagird isə yaralanaraq xəstəxanaya yerləşdirilib.

***

Səhiyyə Nazirliyindən “Qafqazifo”ya verilən məlumata görə, qəza nəticəsində 1 uşaq aldığı xəsarətlərdən yerində dünyasını dəyişib. Biri sürücü olmaqla 7 nəfər müxtəlif xəsarətlərlə Salyan Mərkəzi Rayon xəstəxanasına yerləşdirilib. Onlardan 6-sının vəziyyəti normal, birinin vəziyyəti isə ağır stabil qiymətləndirilir.

***

Salyan Mərkəzi Rayon xəstəxanasından “Qafqazinfo”ya bildirilib ki, qəzada yaralanan şagirdlər travmatologiya şöbəsinə yerləşdirilib: “Yaralılar müxtəlif dərəcəli xəsarətlər alıb. Hazırda həkim müdaxiləsi edilir”.

***

Şirvan şəhər Gənclər və İdman İdarəsindən “Qafqazinfo”ya bildirilib ki, şəhərin Şahmat Məktəbinin direktoru Samir Əhmədov özü uşaqları yığaraq yarışa aparıb: “Bu səfər rəsmi olmadığı üçün şagirdlər haqda məlumatımız yoxdur. Samir müəllim özü də avtobusda olub, onunla əlaqə saxlaya bilmirik”.