Şəkidə orta məktəbdə zəhərlənmə baş verib.

Hadisə rayonun Qudula kənd orta məktəbində qeydə alınıb. Məktəbinin 24 şagirdi və 3 müəllimi zəhərlənmə diaqnozu ilə Şəki Rayon Mərkəzi Xəstəxanasına (RMX) çatdırılıb.

Xəstəxanaya daxil olan şagird və müəllimlərə lazımi tibbi yardım göstərilib. İlkin yardım göstərildikdən sonra xəstəxanaya daxil olanlardan 23 nəfərin vəziyyəti normallaşıb və onlar ambulator müalicə almaq şərti ilə evə buraxılıblar. 4 nəfərin müalicəsi xəstəxanada davam edir.

İlkin müayinə zamanı 24 şagirdin və 3 müəllimin zəhərlənməsinə məktəbin inzibati binasında dezinfeksiya işlərinin aparılmasında istifadə edilən kimyəvi dərmanın səbəb olduğu müəyyənləşib.

Şəki rayon Qudula kənd orta məktəbində baş verən kütləvi zəhərlənmə hadisəsi ilə bağlı Şəki Rayon İcra Hakimiyyəti Başçısının Qudula kənd ərazi dairəsi üzrə nümayəndəsi Aslan Mirhəsənov bildirib ki, havanın istiləşməsi ilə bağlı bir-neçə gün əvvəl məktəb binasında ilanlar görünüb. Ötən həftənin son dərs günü mayın 19-u dərsdən sonra məktəbin binasında ilanlara qarşı dezinfeksiya işləri aparılıb.