"Kanal1.az"
Azərbaycanın Vətən Müharibəsindəki qələbəsi nə 44 günün işidir, nə bir ilin, nə də 10 ilin. Təməli XX əsrin sonlarında Ulu öndər Heydər Əliyev tərəfindən qoyulan dövlətçilik ənənəsi əsasında müasir Azərbaycanın qurulması istiqamətində ilk addımlar hələ 2003-cü ildə atılmağa başladı. Həmin il Azərbaycan Respublikasının Prezidenti seçilən İlham Əliyev xalq qarşısında verdiyi vədlərə sahib çıxdı və onların həyata keçirilməsi istiqamətində əməli addımlar atdı. Güclü Azərbaycan dövlətinin qurulmasında, Azərbaycanın milli maraqlarının müdafiəsində dövlət başçısının nümayiş etdirdiyi prinsipiallıq, qətiyyət, düşünülmüş siyasət bugünkü qələbəmizin bünövrəsində dayanan əsas faktorlardır. Azərbaycanın ərazi bütövlüyünü qoruyacağını vəd edən İlham Əliyev sözünü yerinə yetirdi, xalqın etimadını tam doğrultdu, işğal altında olan torpaqları azad etdi. Təsadüfi deyil ki, 44 günlük müharibənin gedişatında Xalq, Ordu, Ali Baş Komandan birliyi Azərbaycan tarixində heç vaxt bu qədər nəzərə çarpacaq səviyyədə olmamışdı. Liderinə inanan xalqın bir yumruq kimi Ordusunun və dövlət başçısının ətrafında sıx birləşməsi 30 illik işğala son qoydu.

Ermənistan-Azərbaycan münaqişəsinin həlli ilə məşğul olan beynəlxalq qurumların ikili standartları, ədalətsizliyi, münaqişəni dondurmaq, Azərbaycanın maraqlarına zidd şəkildə həllinə nail olmaq siyasəti düşmənin əlini-qolunu daha da açdı. İstər 2016-cı il Aprel döyüşləri dövründə, istərsə də sonrakı illərdə Ermənistan rəhbərlərinin münaqişəni həll etmək vədlərinin üstündə durmamaları, vaxt udmağa çalışmaları, danışıqlar limitinin bitməsi ilə nəticələndi ki, perspektivsiz prosesə çevrilən münaqişənin sülh yolu ilə həlli prosesi işğal altındakı ərazilərdə hərbi əməliyyatların başlamasını qaçılmaz etdi.

Prezident İlham Əliyev ötən gün Hərbi Qənimətlər Parkının açılışında təltif olunan hərbi qulluqçularla görüşündə nitqi zamanı II Qarabağ müharibəsində Azərbaycanın qələbəsini zəruri edən amillərdən danışarkən milli-mənəvi ruhumuzun qələbəmizdə əvəzsiz olduğunu xüsusilə qeyd edib. Dövlət başçısı bildirib ki, bundan sonra da erməni vəhşiliyini heç vaxt unutmamamlıyıq: "Biz çox xeyirxah xalqıq. Bu, həm bizim üstünlüyümüzdür, eyni zamanda, qarşısında vəhşi olanda, xeyirxah olmaq olmaz. Onlara elə cavab verməliyik ki, bunu öz tarixi yaddaşlarında əbədi saxlasınlar, bu, onların yaddaşlarından heç vaxt silinməsin və silinməyəcək". Prezident İlham Əliyev Rusiya sülhmərmalılarının nəzarətində olan ərazilərdə düşmən qüvvələrinin törətdiyi müxtəlif təxribatlarla bağlı da Ermənistana xəbərdarlıq edib: "Bu gün orada baş qaldıran bəzi revanşist qüvvələr də bilməlidirlər, dəmir yumruq yerindədir, lazım olarsa, bunların başını elə əzərik və buna əbədi son qoyulacaq".

Bu illər ərzində siyasi, iqtisadi, hərbi, milli-mənəvi aspektlərin paralel olaraq yüksələn xətt üzrə inkişafı, iqtisadi müstəqillik və inkişafın təmin edilməsi, güclü ordu quruculuğu, beynəlxalq münasibətlərdə Azərbaycanın milli maraqlarının müdafiəsi və təmin edilməsi, vətəndaş-xalq birliyinin, dəstəyinin təmin edilməsi Azərbaycanın məqsədyönlü siyasətinin tərkib hissəsi idi. Nəticədə Ermənistanın bütün enerji, nəqliyyat və digər layihələrdən təcrid olunması, iqtisadi cəhətdən çökdürülməsi, dalan ölkəyə çevrilməsi qaçılmaz oldu. Bu gün Ermənistan kapitulyasiyası kimi qəbul edilən 10 noyabr bəyanatının bəndlərini icra etmək əvəzinə yenidən məsuliyyətdən yayınmaq cəhdləri, prosesi ləngitmək, uzatmaq məqsədilə təxribatlarından əl çəkməyəcəyi təqdirdə Azərbaycanın dəmir yumruğunun daha ağır fəsadları ilə qarşı-qarşıya qalacaq.