Bakının səbr kasası doldu: “Dəmir yumruq” işə düşə bilər
İrəvan anklav və eksklavlar məsələsinə daha sonra baxılmasını, həmçinin bu cür sahələrin delimitasiya və demarkasiyasının hüquqi qüvvəyə malik sənədlər əsasında işlənməsini düşünür. Bu barədə Ermənistan hökuməti "Sputnik Ermənistan”nın yazılı sorğusuna cavab olaraq bildirib.
Hökumət Ermənistanın Baş naziri Paşinyanın martın 12-də verdiyi bəyanata da istinad edərək, xatırladıb ki, rəsmi İrəvanın beynəlxalq səviyyədə tanınmış ərazisindən kənarda heç bir əraziyə iddiası yoxdur.
Bəs görəsən Ermənistanın bu təklifi rəsmi Bakı tərəfindən qəbul edilə bilərmi?
Mövzu ilə bağlı Yenisabah.az-a danışan politoloq Turan Rzayev bildirib ki, hazırda Ermənistanın qeyd etdiyi kimi bir sənəd mövcud deyil:
"Ümumiyyətlə, Ermənistan tərəfinin qeyd etdiyi kimi bir sənəd ortada yoxdur. Çünki tərəflər delimitasiya və demarkasiyanın hansı ilin xəritəsinə görə müəyyən ediləcəyinə dair hansısa bir razılığa gəlməyib. Belə olan təqdirdə Ermənistanın qeyd etdiyi məsələ ilə bağlı Azərbaycan tərəfi razılıq verməyəcək. Azərbaycanın məsələyə baxış bucağı aydındır, biz açıq şəkildə qeyd edirik ki, ən azı anklav olmayan 4 kənd qaytarılmalıdır. Çünki bu kəndlər Birinci Qarabağ müharibəsi zamanı işğal edilib. Belə olan təqdirdə həmin kəndlərin ilk növbədə işğaldan azad edilməsi mütləq lazımdır. Geriyə qalan anklav və eksklavlar məsələsi tədricən sərhəd komissiyalarının görüşü zamanı həll edilə bilər. Ancaq burada Ermənistanın qeyd etdiyi məsələ sadəcə prosesi daha da uzatmağa istiqamətlənib. Ona görə də Azərbaycanın buna razı olacağını düşünmürəm”.
Politoloq qeyd edib ki, Ermənistan bu təkliflə status-kvonun dəyişməsini istəyir:
"Əgər Azərbaycan və Ermənistan delimitasiyanı hansı xəritələr əsasında aparacaqları barədə razılığa gəlsələr, o zaman bu variantı işə salmaq olar. Sərhəd komissiyalarının görüşləri hələ davam edir və nazirlər səviyyəsində görüşlər keçirilir. Qeyri-rəsmi təmaslar da mövcuddur. Bunlar müsbət və pozitiv məqamlardır. Lakin bütün hallarda hələki yekun bir razılıq yoxdur. Ermənistan tərəfinin təklifi məqbul deyil və vaxt uzatmağa hesablanıb. Onlar mövcud status-kvonun dəyişilməsinə ümid bəsləyirlər. Azərbaycan tərəfi isə qısa zamanda məsələnin həll edilməsini istəyir. Düzdü, delimitasiya və demarkasiya uzunmüddətli prosesdir, amma ilkin sülh müqaviləsi imzalana bilər. Daha sərhədlərin hansı xəritələr əsasında təyin ediləcəyini razılaşmaq olar”.
Son xəbərlər
Ən çox oxunanlar
- Bu gün
- Bu həftə
- Bu ay