Hadisə / Manşet
2.05.2021, 18:37
Bakıda ana söyüşü üstündə qətl - Sabunçu daxmalarının kirayənişinləri, nisyə araq cinayəti
Bakının Sabunçu qəsəbəsində, gecəqondu daxmalarda kirayə qalan, günəmuzd fəhləliklə güzəran sürən, amma nisyə araqla içki məclisi təşkil edən yoxsul azərbaycanlıların davası qətllə nəticələnib. İndi bu işə Bakı Ağır Cinayətlər Məhkəməsi baxır. Və qəsdən adam öldürməkdə ittiham olunan 26 yaşlı Füzuli köçkünü Kamran Əliyev müttəhimlər kürsüsündə oturub.
“Kanal1.az” bildirir ki, hadisə ötən il iyulun 27-də gecə saatlarında paytaxtın Sabunçu qəsəbəsi, 2 aprel küçəsi, ev 31-də baş verib. Qəsəbə sakini, əslən Qərbi Azərbaycanın Masis rayonundan olan 56 yaşlı Hüsnü Əliyevin meyiti kirayə yaşadığı evin həyətində aşkarlanıb. Araşdırmalar zamanı qətli digər kirayənişin Kamran Əliyevin törətdiyi məlum olub.
İstintaq orqanı tərəfindən K.Əliyevə Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb və barəsində Sabunçu rayon məhkəməsinin qərarı ilə 4 aylıq həbs qətimkan tədbiri seçilib.
İstintaqla müəyyən edilib ki, K.Əliyev kirayə yaşadığı evin həyətində qonşuları Hüsnü Əliyev və Rəşid Hacıyevlə birgə yeyib-içəndən sonra aralarında mübahisə yaranıb. Özündən 30 yaş böyük olan H.Əliyevin onun mərhum anasının ünvanına söyüş söyməsindən hiddətlənən Kamran araq yoldaşını ürəyindən bıçaqla vurub.
Təqsirləndirilən Kamran Əliyev ifadəsində deyib ki, həmin ünvanda xalasının ailəsi ilə birgə kirayədə yaşayırdı, həyətdə onlardan başqa bir neçə kirayənişinin də qalırdı. Özündən 30 yaş böyük Hüsnü kişini bir neçə gün öncə içki məclislərindən tanıyan Kamran onunla süfrə arxasında əyləşib, yeyib-içib. Növbəti içki süfrəsi isə Hüsnü kişini o biri dünyaya, Kamranı həbsxanaya göndərib.
"Xalamla birgə evə bazarlıq edib qayıdanda Hüsnü kişi məndən axşama araq almağımı istədi, razılaşdım. Axşam oturub birlikdə yeyib-içdik. Qonşuluqda yaşayan Rəşid də bizimlə bir süfrədə oturmuşdu. Hüsnü Rəşidə rusca nəsə dedi, başa düşmədim. Niyə rusca danışdıqlarını soruşduqda Rəşid dedi ki, araq qurtarıb yenidən araq almaq lazımdır. Dedim ki, daha mənim pulum yoxdur. Rəşid də sakitcə qulağıma "gedək bir yerdə alaq gələk"-dedi"- K.Əliyev ifadəsində bu cür deyib.
R.Hacıyevlə birgə mağazaya yollanan Kamran arağı nisyə alıb və qayıdıb, içki məclisi davam edib. Nisyə alınan araq bitəndən sonra masa arxasında oturanlar arasında mübahisə yaranıb. Mübahisəyə səbəb isə Hüsnünün Kamranın ünvanına nalayiq ifadələr işlətməsi olub.
"Avtomoyka"larda günəmuzd işləyib başını dolandırmağa çalışan K.Əliyevin ifadəsinə görə, H.Əliyevdən söyüşlərin kimə aid olduğunu soruşduqda "sən məni tanıyırsan, mən "Zabrat Ceyhun"un əmisiyəm, onu çağıraram üç maşınla gələr bura, sənin də..." cavabını eşidib.
Və Kamran bu təhdidi və söyüşü götürməyib, onun dünyadan köçmüş anasını söydüyünə görə Hüsnünü öldürməyi qərara alıb. Həyətdəkilər görməsin deyə haqq-hesab çəkmək üçün ondan çölə çıxmasını xahiş edib. Mübahisə həyətin qarşısında davam edib. Bıçaqla Hüsnü kişini ürəyindən vuran Kamran onun öləcəyinə əmin olub, qoluna girərək həyətə gətirib. Daha sonrasa hadisə yerini tez-tələsik tərk edib. Gecəni tanışlarından birinin evində qalan Kamran törətdiyi hadisə haqda heç kimə heç nə deməyib. Ertəsi gün taksi ilə Füzuli rayonuna getmək istəyərkən polis əməkdaşları tərəfindən Binə qəsəbəsində saxlanılıb.
Son xəbərlər
Ən çox oxunanlar
- Bu gün
- Bu həftə
- Bu ay