ABŞ dünyada koronavirusa qarşı effektiv dərman sayılan “Remdesivir”in 90% ehtiyatlarını satın alıb. Kaliforniyada yerləşən “Gilead Sciences” bioşirkətinin hazırladığı dərmanın 500 min dozu Ağ Ev adminisyrasiyası tərəfindən alınıb.

Bu barədə ABŞ prezidenti Donald Tramp bildirib. Nəticədə, xarici ölkələrin şirkətdən “Remdesivir” alması xeyli çətinləşib.

Qeyd edək ki, “Ebola” virusuna qarşı hazırlanmış dərmanın klinik sınaqlar zamanı koronavirusa qarşı effektiv olduğu, virusun çoxalmasının qarşısıın uğurla aldığı sübut olunub.

Azərbaycanda da koronaviruslu xəstələrin müalicəsində sözügedən dərmandan istifadə olunursa, demək, pereparatın ölkəmizdə də tapılması çətinləşəcək.

Azərbaycanın baş infeksionisti Cəlal İsayev Cebhe. info-ya açıqlamasında deyib ki, sözügedən dərman preparatının koronavirusa təsiri dəqiq bəlli deyil. Həmçinin Ümumdünya Səhiyyə Təşkilatı tərəfindən qəbul edilmiş pereparat deyil:

“O dərmandan Azərbaycanda heç kim istifadə etmir. Bilmirəm kim gətirir və istifadə edir, özü bilər. Bu dərmanı həkimlər yazmır və bizim müalicə protokoluna da daxil deyil”.

Qeyd edək ki, Azərbaycanda qəbul olunan “Tibb işçiləri üçün müvəqqəti rəhbərlik”də spesifik virus əleyhinə müalicə olmadığı və patogenezi tam bilinmədiyi üçün müalicə dəstəkləyici, ikincili yoluxma və ağırlaşmaların qarşısını almaq istiqaməti əsas götürülür.

Müalicə edərkən:

a) Tənəffüs çətinliyi, hipoksemiya və şok olan xəstələr üçün əlavə oksigen terapiyası
tövsiyə olunur.
b) Şok əlamətləri olmadıqda, SARI xəstələrində konservativ maye terapiyası tövsiyə
olunur.
c) SARI-yə səbəb ola biləcək mümkün patogenlər üçün empirik antimikrob preparatlar (antibiotiklər, influenza neyroaminidaza inhibitorları, antifunqal preparatlar)
tövsiyə olunur. Sepsis olan xəstələrə müayinədən sonrakı ilk bir saat ərzində antimikrob preparatlar verilməlidir.
d) Başqa bir səbəblə göstəriş olmadığı müddətcə virus mənşəli pnevmoniya və ya
ARDS müalicəsi üçün sistematik kortikosteroidlərdən istifadə olunmamalıdır. Müşahidə tədqiqatları SARS xəstələrində tətbiq olunan kortikosteroidlərin sağ qalma
üçün fayda vermədiyini, ancaq mümkün zərərin (avaskulyar nekroz, psixoz, diabet
və virus klirensinin ləngiməsi) ola biləcəyini bildirilmişdir.
e) SARI olan xəstələr sürətlə yaranan tənəffüs çatışmazlığı və sepsis üçün yaxından
izlənilməli və lazım olduqda dəstəkləyici müalicə tətbiq olunmalıdır.
f) Kritik xəstələrin təqibində yanaşı gedən xəstəlikləri izləmək çox vacibdir.
g) Hazırda koronavirus infeksiyaları əleyhinə peyvənd mövcud deyil.