Son vaxtlar ölkəmizin hüquq-mühafizə orqanları sahəsində çalışan bəzi vəzifə sahiblərinin atdıqları addımlarla bağlı ictimai fikirdə çoxsaylı şübhələr, müəyyən söz-söhbətlər baş qaldırmaqda davam edir. Sözsüz ki, buna müxtəlif amillərin varlığı səbəb olur və həmin amillər içərisində ən əsası, qanunun keşiyində duran hüquq-mühafizə orqanı əməkdaşlarından bəzilərinin, məhz mövcud qanunvericiliyin tələblərini tapdaqlar altına atmaları olur. Məsələn, bugünlərdə Bakı şəhəri, Binəqədi rayonu, Mədən-1, Korpus-15 ünvanında qeydiyyatda olan Allahyarlı Elnur Oqtay oğlunun, Azərbaycan Respublikasının prezidenti cənab İlham Əliyevə, Birinci vitse-prezidenti Mehriban xanım Əliyevaya, Baş Prokuroru cənab Kamran Əliyevə, Daxili İşlər naziri cənab Vilayət Eyvazova və KİV nümayəndələrinə yazmış olduğu şikayət ərizəsinin bir surəti Nyus.Az saytının redaksiyasına da daxil olub. Elnur Allahyarlı yazmış olduğu ərizəsində qeyd edir: “07 iyul 2020-ci il tarixdə bizim evə qonaq gəldiyi üçün, yaşadığımız mənzilin yaxınlığındakı mağazaya çörək almağa getdim. Elə ki, mağazadan çörək alıb geri qayıtdım, o halda yol kənarında dayanıb birbiri ilə söhbət edən Orxan adlı şəxs və onunla birlikdə olan bir neçə nəfər tanımadığı şəxslər mənə salam verdilər. Həmin vaxt onların verdikləri salama əleykumə salam deyə cavab verdim. O halda onlar “niyə salam vermirsən, salam vermək lazımdır” deyib, mənə öz iradlarını bildirdilər. Belə bir iradı eşidib həmin şəxslərə tərəf yaxınlaşdım və onlara salam vermirəm əcəb edirəm dedim. Qısa müddətli mübahisədən sonra Orxan ayağa qalxdı və üstündəki buçaqla məni vurmaq istədikdə cəld tərpəndim və özümü müdafiə etmək məqsədilə ilk əvvəl mən onu vurdum. Məqsədim Orxanı zərərsizləşdirmək və onun əlindəki buçağı almaq idi. Elə ki, o, vurduğum zərbənin təsirindən yerə yıxıldı, o halda onunla birlikdə olan şəxslər məni tutdular və Orxan ayağa qalxıb bədənimin müxtəlif hissələrinə bir neçə dəfə buçaqla vurdu. Düzdür, alqan içində olsam da, həmin vaxt bir kimsə mənə lazımi köməklik göstərmədi və birtəhər özümü M.N.Qasımov adına Respublika Klinik Xəstəxanasına çatdıra bildim. Az sonra baş verən qanlı hadisə haqda DİN-nin 102 xidmətini də məlumatlandırdım. Aldığım buçaq yaralarına görə, Respublika Klinik Xəstəxanasında bədənimin müxtəlif nahiyələrinə bir neçə tikiş qoydular və “siz xəstəxanada da qala bilərsiniz, evə də gedə bilərsiniz” deyə mənə məsləhət gördülər. Evə getməyimi ona görə məsləhət gördülər ki, xəstəxanada koronovirusdan və digər xəstəliklərdən müalicə olunan xəstələr sayca çoxluq təşkil edirdi. Onu da qeyd edim ki, M.N.Qasımov adına Respublika Klinik Xəstəxanasında olarkən Binəqədi RPİ-i, 43-cü polis bölməsinin təhqiqatçısı, polis kapitanı Rəşad Bayramov xəstəxanaya gəldi. O, xəstəxanada ümumi vəziyyətimi gördü və az sonra evimizə gəlib, hadisənin necə və hansı şəraitdə baş verməsi, hansı şəxs və yaxud şəxslər tərəfindən törədilməsi və s. haqqında məndən yazılı izahat aldı. Onu da bildirim ki, yazmış olduğum izahatımı özüm imzaladım. Baş verən buçaqlanma hadisəsi haqqında polis əməkdaşlarına yazılı izahat versəm də, mənə buçaq xəsarətləri yetirmiş Orxan adlı şəxs atdığı addımına görə, məhz həmin vaxta qədər saxlanmamışdı.
9 iyul 2020-ci il tarixdə Binəqədi RPİ-nin müstəntiqi Rövşən Cavadov adlı polis əməkdaşı mənə zəng etdi və “Orxanı həbs etmişik, vaxt et Binəqədi RPİ-nə gəl” dedi. Elə ki, müstəntiqin yanında oldum və Orxanla üzləşmə prosesi həyata keçirildi, o halda o, hadisənin necə baş verdiyini olduğu kimi danışdı və “bütün günah məndədir, yanımda olanların heç bir günahı yoxdur” dedi. Həmin vaxt Orxana sual etdim ki, səbəb nə oldu ki, yanında olan şəxslərdən heç biri mənə köməklik göstərmədi, əksinə onlar məni tutmaqla sənin məni buçaqla vurmağına şərait yaratdılar. Belə bir sualımın qarşısında Orxan susdu və başını aşağı dikib mənə heç bir cavab verə bilmədi. 13 iyul 2020-ci il tarixdə müstəntiq Rövşən Cavadov bir daha mənə zəng etdi və təkrar Binəqədi RPİ-nə getməyimi bildirdi. Mən onun belə bir telefon zəngindən sonra iki nəfər dostumla birlikdə RPİ-nə getdim. Həmin vaxt Rövşən Cavadov məni təkid edərək “sən tez bu protokola və bu ifadəyə qol çək. Burada hər şey sənin dediklərin kimi qeyd olunub” dedi. Onu da bildirim ki, ifadəni Binəqədi RPİ-də mənim adımdan yazıb hazırlamışdılar. Elə ki, adımdan yazılmış ifadəni oxudum, həmin vaxt gördüm ki, hazırlanmış ifadədə dediklərimin heç biri qeyd olunmayıb. Belə olan halda ifadəni imzalamaqdan imtina etdim, o halda müstəntiq Rövşən Cavadov təkrar məni təkid etdi ki, “sən bunlara imza at, bunlar boş şeylərdir. Sənədlər məhkəməyə getməlidir, hələ çox sənədlər dəyişdiriləcək, mən məhkəməyə tələsirəm” deməklə, bir növ məni “gipnoz” edib, həmin sənədləri mənə imzalatdıra bildi.
Sonda onu qeyd edirəm ki, lazımi qədər savada malik olmadığımdan, qanunları lzımınca bilmədiyimdən, həmçinin müstəntiq Rövşən Cavadovun təkidli addımları qarşısında aldadıldığımdan, bu gün etdiyim səhvlərimi başa düşmüşəm. Yəni, onu bildirmək istəyirəm ki, 13 iyul 2020-ci il tarixdə müstəntiq Rövşən Cavadovun mənə imza atdırdığı sənədləri bilərəkdən deyil, bilməyərəkdən imzalamışam.
Ona görə də bu gün vəzifə sahibi olan və ünvanına şikayət ərizəsi göndərdiyim şəxslərdən xahiş edirəm ki, müstəntiq Rövşən Cavadovun mənə qarşı atdığı təkidli addımları araşdırılsın, bu şəxsin əməllərinə hüquqi qiymət verilsin. Çünki, Binəqədi RPİ-də müstəntiq vəzifəsini daşıyan bu şəxsin baş verən hadisələrə yanaşması, məhz ortaya çoxsaylı sualların çıxmasına da səbəb olur. O halda sual oluna bilər ki, görəsən Rövşən Cavadovun belə bir addımlar atmasına, yəni baş verən hadisələrə fərqli yanaşmasının kökündə nələr durur? Düşünürəm ki, belə bir əməl və düşüncə sahibi olan müstəntiqin mənə qarşı atdığı təkidli addımları, Azərbaycan Respublikasının Daxili İşlər naziri cənab Vilayət Eyvazov da diqqətdə saxlayacaq. Yəqin ki, o halda adı çəkilən vəzifə sahibinə çoxsaylı suallar ünvanlanacaq və atdığı addımların mahiyyəti ondan hüquqi qaydada soruşulacaq”.

P.S. Hörmətli oxucular! Biz hadisənin başvermə səbəbləri haqda müəyyən məlumatları əldə etdikdən sonra, yaşanan olayın ictimailəşdirilməsinə qərar verdik. Odur ki, mövzunu bundan sonra da diqqətdə saxlayacağıq. Məqalədə adı çəkilən şəxslərin də, yaşanan olayla bağlı münasibətlərini dinləyə bilərik.

Nyus.Az