Bu günlərdə xalqımızın milli-mənəvi əxlaqına, mənəvi dəyərlərinə zidd olan sensasion bir audio səs yazısı Youtube kanalında yayımlanması, sanki ölkə ictimaiyyətini “birbaşa silkələməkdədir”.

Yaşanan olayın kökündə hansısa problemin aradan qaldırılması, hansısa uğurun qeyd olunması, hansısa lahiyə proqramının həyata keçirilməsi və s. kimi məsələlərin varlığı deyil, məhz Şirvan şəhər Kommunal Xidmətlər idarəsinə rəhbərlik edən Xanəli Əzizov adlı bir şəxsin, tabeçiliyində çalışan və bir tikə çörəyə möhtac olan qadın işçisinə qarşı seksual təkliflər etməsi durur. Düzdür, etik baxımından belə bir mövzunun ictimailəşdirilməsi yolverilməz hal olsa da, bu cür düşüncə ​ sahibini ifşa etmək, bəlkə də indiki vaxtda yerinə düşən məsələlərdəndir. Çünki, minbir əzab-əziyyətlə övlad böyüdüb hərbi xidmətə yola salan və övladının evlərinə dönəcəyi günün hər anını səbsizliklə gözləyən, olmazın əziyyətlərin qarşılığında halal zəhmətə alışan bir Azərbaycan qadınına qarşı belə bir davranış, sanki insanlıqdan kənar bir addımdır. Onu da unutmaq olmaz ki, Xanəli Əzizov ölkə rəhbəri cənab İlham Əliyevin təbrincə desək “qudurğan məmur”lar sıyahısına daxil olan vəzifə sahibi olduğundan, yəqin ki, o, atdığı addımın nə ilə nəticələnəcəyinə heç bir halda əhəmiyyət verməyib. Yəni, bu şəxs tabeçiliyində çalışan və bir tikə çörəyə möhtac qalan xanım əməkdaşına qarşı utanmadan, qızarmadan seksual təkliflər edərkən, həmin qadının əsgər anası olmasına belə məhəl qoymayıb. Şirvan şəhər Kommunal Xidmətlər idarəsinə rəhbərlik edən bu şəxsin tabeçliyində çalışan qadına seksual təkliflərini qəbul etməyəcəyi təqdirdə, hətta ona zorlayacağı anonsunu verməsi, heç bir əndazəyə sığası məsələ deyil. Yəqin ki, bu kimi addımların kökündə Xanəli Əzizovun rəhbərlik etdiyi idarədə korrupsiya və rüşvətxorluq yolu ilə əldə olunan haram pulların varlığı əsas önəm daşıyır. Əgər bu belə olmasaydı, o halda idarə rəisi vəzifəsini daşıyan və tabeçiliyində çalışan məzlum bir qadına qarşı “yuxarıdan aşağı baxan”, kefinin “kök vaxtında” onu zorlamaq niyyətinə düşən bu şəxs, “qırmızı xətti” bu qədər keçməzdi.
O halın varlığını da nəzərə alaq ki, “Facebook” sosial şəbəkədə “Bizim Şirvan” səhifəsində Şirvan şəhər Komunal Kombinat müəssisəsinin müdiri Xanəli Əzizovun, tabeçiliyində çalışan süpürgəçi qadına qarşı etdiyi əxlaqsızlıq təklifi ilə bağlı səsyazısının yayılması, bu gün nəinki şirvanlıların, hətta bütövlükdə ölkə əhalisinin hiddətinə səbəb olub.



Çünki bir əsgər anasına, imkansız bir Azərbaycan qadınıına qarşı belə bir davranış, birbaşa insanlıqdan kənar addımdır. Məsələnin düşündürücü tərəfi isə, Şirvan şəhər İcra Hakimiyyətinin başçısı cənab İlqar Abbasovun, baş verən belə bir olayla bağlı susmasıdır. Çünki, ilk gündən tam əksəriyyət o qənaətdə idi ki, böyük bir şəhərə rəhbərlik edən, illər uzunu rəhbər vəzifə daşımaqla atılan hər bir addıma qarşı öz yanaşmasını ortaya qoymağı bacaran İlqar müəllim, belə bir olayla bağlı dərhal qəti qərarını qəbul edəcək. Yəni, o, Şirvan şəhər sakinlərinə utanc hissi gətirən və adı iki söz birləşməsindən əmələ gələn Xan və Əlini (red- Xanəli) daşıdığı vəzifəsindən azad edib, dolaşan söz-söhbətlərə “stop” qoymağı da bacaracaq. Hətta, bu şəxsin atdığı addımlara görə onun hüquqi məsuliyyətinin müəyyən olunması yöndə,​hüquq-mühafizə orqanlarına lazımi tapşırığını da verəcək. Təəssüf hissi ilə qeyd edək ki, hələ də atılacaq belə bir addımın işartıları hiss olunmur ki, olunmur. Deməli, media üzərindən apardığımız müəyyən araşdırmalar onu söyləməyə əsas verir ki, cənab İlqar Abbasovun hələ də susqunluq nümayiş etdirməsinin kökündə 10 min manatlıq “haqq-hesab”ın varlığı, heç də əhəmiyyətini itirməyib.

Bir faktı da qeyd edək ki, Şirvan şəhər Kommunal Xidmətlər idarəsinə rəhbərlik edən Xanəli Əzizovun əməllərinə etiraz edən Şirvan şəhər sakinlərinin, ŞİH-nin başçısından gözlədikləri gözləntilər nəticəsiz qaldığından, onlar yaşanan olayın araşdırılması məqsədilə Azərbaycan Respublikasının prezidenti cənab İlham Əliyevə, Birinci vitse-prezident Mehriban xanım Əliyevaya, Baş Prokuror cənab Kamran Əliyevə və Daxili İşlər naziri cənab Vilayət Eyvazova müraciət ünvanlayıblar. Yəni, bu haqda bəzi media qurumlarında müəyyən açıqlamalar yayımlanıb. Düşünürük ki, belə bir müraciət adı çəkilən şəxslər tərəfindən diqqətdə saxlanılacaq və adı iki söz birləşməsindən əmələ gələn Xan və Əli (red- Xanəli), xanlıq dövrünün qanunları ilə deyil, daha sivil qanunlarla cəzalandırılacaq.